சாத்தான்குளம் லாக்கப் டெத்.. 5 போலீசார் மீது கொலை வழக்குப் பதிவு செய்து கைது!
By Aruvi | Galatta | Jul 02, 2020, 09:53 am
![சாத்தான்குளம் லாக்கப் டெத்.. 5 போலீசார் மீது கொலை வழக்குப் பதிவு செய்து கைது! - Daily news சாத்தான்குளம் லாக்கப் டெத்.. 5 போலீசார் மீது கொலை வழக்குப் பதிவு செய்து கைது! - Daily news](https://d1ydle56j7f53e.cloudfront.net/assets/galattadaily/1593664002FotoJet---2020-07-02T094725755.jpg)
சாத்தான்குளம் லாக்கப் டெத் விவகாரத்தில் சம்மந்தப்பட்ட 5 போலீசார் மீது கொலை வழக்குப் பதிவு செய்யப்பட்டு அவர்கள் அனைவரும் அடுத்தடுத்து கைது செய்யப்பட்டுள்ளனர்.
தூத்துக்குடி மாவட்டம் சாத்தான் குளத்தில், செல்போன் கடை நடத்தி வந்த ஜெயராஜ் மற்றும் இவரது மகன் பென்னிக்ஸ் ஆகிய இருவரும் ஊரடங்கு விதி முறைகளை மீறி கடையைத் திறந்ததாகக் கூறி, இருவரையும் போலீசார் விசாரணைக்கு அழைத்துச் சென்றனர். பின்னர், தந்தை - மகன் இருவர் மீதும் வழக்குப் பதிவு செய்து கைது செய்த போலீசார், அவர்களை கோவில்பட்டி கிளை சிறையில் அடைத்தனர்.
சிறையில் அடைத்த அன்று இரவே பென்னிக்சுக்கு திடீரென நெஞ்சுவலி ஏற்பட்டு உயிரிழந்ததாகக் கூறப்பட்டது. மறுநாள் காலை தந்தை ஜெயராஜூம் உயிரிழந்துள்ளார் என்றும் தெரிவிக்கப்பட்டது. விசாரணைக்கு அழைத்துச் செல்லப்பட்ட தந்தை, மகன் அடுத்தடுத்து சிறையிலேயே உயிரிழந்ததால், அப்பகுதியில் பெரும் பதற்றமும், பரபரப்பும் ஏற்பட்டது. இதனால், கடும் ஆத்திரமடைந்த பாதிக்கப்பட்டவர்களின் உறவினர்கள் மற்றும் அந்த பகுதி வியாபாரிகள், ஊர் மக்கள் அனைவரும், சாத்தான் குளத்தில் மறியல் போராட்டத்தில் ஈடுபட்டனர். இதனால், அங்கு பெரும் பரபரப்பு ஏற்பட்டது.
தூத்துக்குடியில் விசாரணைக்காக அழைத்துச் செல்லப்பட்ட தந்தையும் - மகனும் உயிரிழந்த விவகாரத்தில், காவல் நிலையத்தில் இருவருக்கும் பாலியல் துன்புறுத்தல்கள் கொடுக்கப்பட்டதாக அதிர்ச்சி தகவல் நேற்று வெளியானது. குறிப்பாக, இருவரின் ஆசன வாயில் போலீசார் லத்தியை உள்ளே விட்டு கடும் சித்திரவதை செய்து கொடுமைப் படுத்தியதாவதாகவும், ஜெயராஜ் - பென்னிக்ஸ் உறவினர்கள் போலீசார் மீது பகிரங்கமாகக் குற்றம் சாட்டினார்.
இந்த செய்தி, உலகம் முழுவதும் வேகமாகப் பரவியது. இதனால், மதுரை உயர்நீதிமன்ற மதுரை கிளை தாமாக முன் வந்து வழக்கு விசாரணை செய்தது. இந்த விவகாரம் தொடர்பாக சாத்தான் குளம் காவல் நிலையத்தில் நீதித்துறை நடுவர் பாரதிதாசன் நேற்று முன் தினம் விசாரணை மேற்கொண்டார். இந்த விசாரணையின் போது, காவல்துறை கூடுதல் கண்காணிப்பாளர் குமார், டி.எஸ்.பி. பிரதாபன், காவலர் மகாராஜன் ஆகியோர் விசாரணைக்கு ஒத்துழைக்க மறுத்ததாகவும், வழக்கு ஆவணங்களைத் தர மறுத்ததாகவும் கூறி நீதித்துறை நடுவர் பாரதிதாசன், உயர்நீதிமன்ற மதுரை கிளைக்கு இமெயில் மூலம் புகார் அளித்தார்.
அந்த புகாரில் குறிப்பாக, “போலீசை உன்னால் ஒன்றும் செய்ய முடியாது” என்று போலீசார் மகாராஜன் பேசியதாகப் பதிவு செய்யப்பட்டுள்ளது. இதனால், கடும் ஆத்திரமடைந்த உயர் நீதிமன்ற மதுரை கிளை, 3 போலீசாரையும் உடனடியாக பணியிட மாற்றம் செய்ய உத்தரவிட்டிருந்தது. அதன் அடிப்படையில், கூடுதல் கண்காணிப்பாளர் குமார், டி.எஸ்.பி. பிரதாபன் ஆகியோரை காத்திருப்போர் பட்டியலுக்கு மாற்றம் செய்யப்பட்டனர். நீதிபதியை அவதூறாகப் பேசிய காவலர் மகாராஜன் பணி இடை நீக்கம் செய்யப்பட்டார்.
அத்துடன், “ஜெயராஜ் - பென்னிக்சை போலீசார் விடிய, விடிய அடித்தனர்” என்று மாஜிஸ்திரேட் பாரதிதாசன் உயர்நீதிமன்ற மதுரை கிளையில் தாக்கல் செய்த அறிக்கையில் தெரிவித்துள்ளார். இதனை நேரில் காவலர் ரேவதியின் சாட்சி சொல்லி உள்ளதாகவும், அந்த அறிக்கையில் அவர் குறிப்பிட்டிருந்தார்.
இதனையடுத்து, இதனையடுத்து, வருவாய்த்துறை கட்டுப்பாட்டில் சாத்தான் குளம் காவல் நிலையம் வந்த நிலையில், இந்த வழக்கை சி.பி.சி.ஐ.டி. விசாரணைக்கு எடுத்து வழக்குப் பதிவு செய்தது.
இதன் அடுத்தகட்ட நடவடிக்கையாக சாத்தான்குளம் லாக்கப் டெத் விவகாரத்தில் சம்மந்தப்பட்ட சாத்தான்குளம் எஸ்.ஐ. ரகு கணேஷ், எஸ்.ஐ. பாலகிருஷ்ணன், தலைமை காவலர் முருகன், காவலர் முத்துராஜ் என 4 போலீசார் மீது கொலை வழக்குப் பதிவு செய்யப்பட்டது.
இதனைத் தொடர்ந்து, லாக்கப் டெத் விவகாரத்தில் சம்மந்தப்பட்ட முத்துராஜ் தப்பி ஓடிவிட்டார். தற்ற 3 போலீசாரும் நள்ளிரவில் கைது செய்யப்பட்டனர். இதில், தலைமறைவாகி உள்ளவரை தேடும் பணி தற்போது தீவிரமாக நடைபெற்று வருகிறது.
இந்த வழக்கில், 5 வது நபராக சாத்தான்குளம் காவல் ஆய்வாளர் ஸ்ரீதரை சிபிசிஐடி போலீசார் தற்போது கைது செய்துள்ளனர். மேலும், அவர்களிடம் சி.பி.சி.ஐ.டி. போலீசார் தீவிரமாக விசாரணை மேற்கொண்டு வருகின்றனர். இதனால், போலீஸ் வட்டாரங்களில் பரபரப்பு ஏற்பட்டுள்ளது.
இதனிடையே, ”தந்தை - மகன் உயிரிழக்க காரணமானவர்களுக்கு உரியத் தண்டனையைப் பெற்றுத் தருவதே தமிழக அரசின் நிலைப்பாடு” என்று அமைச்சர் சி.வி.சண்முகம் தெரிவித்துள்ளது குறிப்பிடத்தக்கது.